Sunday, May 30, 2010

اكسر حاجز خوفك من مقابلات العمل:: ::

ساعات كتير بنفكر ازاى اتصرف قبل ماروح اعمل مقابله شخصيه للتقدم الى وظيفه
ببساطه شديده مش عايزك تفكر كتير وتريح دماغك من وجع الراس والتوتر اللى قبل واثناء المقابله
هوه اللى قبليك واللى بعديك عملوا ايه... ماراحوا وعملوا مقابله ونجحوا فى الاختبارات واتقبلوا
عادى يعنى ... من غير ما يعملوا اى حاجة زياده ....
وللموضوع ده ليه قصه جميله احب انى اقولهالكم

فى مره من المرات اللى ماكنتش باشتغل فيها وكنت قاعد فيها على القهوه لا شغله ولا مشغله
اصلى بعد التخرج قعدت ادور على شغل فى كذا مكان بس فى الاخر يقولوا اصله ماعندوش خبره ناخده نعمل بيه ايه
فجت فتره كأبه كده وقعدت من غير شغل بس الحمد لله مش كتير، المهم بعد المحاولات الفاشله اللى عملتها قعدت مع نفسى بعد ما فتره الكأبه ما راحت، قلت ايه اللى كان ناقصنى محتاج اعرف انزليجى على شويه كمبيوتر على شويه معرفه ازاى تعد نفسك لمقابله وهكذا

ومن بعدها قلت حاروح ارمى نفسى فى اى شركه اقابلها اشوف بس انا حاعمل ايه ومش فارق معايا اشتغل ولا ماشتغلش
وماكانش فارق معايا نوع الشركه اللى رايحها ولا حتى الوظيفه اللى كنت مقدم عليها
وحطيت بس فى بالى انى رايح اتعرف على ناس جديده ومكان جديد، ولو فى انترفيوا اعمله حاعمله مافيش مشكله
كنت واخدها ببساطه ، لاقيت اعلان ساعتها فى الوسيط عايزين موظفين لشركه بقالها سنتين فى السوق وتيجى عشان تعرف طبيعه الوظيفه
المهم رحت قبل الميعاد بنص ساعه عشان اشوف واتعرف على المكان ، وحطيت تحت باطى السيره الذاتيه بتاعتى اللى هيه كانت فاضيه تقريبا وعاملها كذا نسخه كمان عشان لو ضاعت واحده او طلبوا السيره الذاتيه مرتين او ثلاثه اهى تبقى موجوده
ولبست الحته الزفره اللى على الحبل، وملمع نفسى وهدومى بكل انواع الصابون والكريمات والشامبو

رحت المكان سألت على مكان الشركه لحد ما لاقيتها، قبل ما ادخل كان فى شويه محلات جنب العماره اللى فيها الشركه، دخلت محل من المحلات دى وعملت نفسى قال حاشترى، اتكلمت شويه مع صاحب المحل لحد ما لاقيته يعرف معلومات عن الشركه اللى انا رايحها فى العماره اللى جنبيه، رحت زودت معاه فى الكلام لحد ما اتصاحبت عليه وعرفت منه الشركه دى بقالها قد ايه وسمعتها ومعروفه ولا لأ وصاحبها مين يعنى معلومات عامه.
على فكره اوعى تعمل كده لا يقولوا عليك مجنون.... المفروض ان الواحد قبل ما يروح الشركه يكون عارف معلومات عنها كتير عشان لما يسألوك ويلاقوك عارف حيعرفوا ان انت مهتم بيهم ومحضر نفسك كويس وتكسب بكده بنط عندهم، بس انا كنت مستبيع فعملت كده قبل ما ادخل الشركه.... المهم اخدت معلومات عامه كافيه عن الشركه. وماحدش سألنى تعرف ايه عن شركتنا فى الانترفيوا.. ما علينا

سميت قبل ما ادخل الشركه ودعيت ربنا يوفقنى، لاقيت موظفه استقبال على وجهها ابتسامه جميله وقبل ما اقول اى كلمه لاقيتها بتقول لى
" حضرتك جاى عشان الوظيفه" قلت لها أيوة بالظبط... قالت لى اتفضل استريح فى الصالون
بابص على الصالون لاقيته بسم الله ماشاء الله مليان على اخره ... كل دول جايين يقدموا على الوظيفه؟ قلت فى بالى خير ان شاء الله كده مش حاخلص غير بعد ساعتين وتقريبا ده اللى حصل ، فكرت نفسى انى جاى اتعرف مش اتوظف عشان ماوترش نفسى والتزم بهدوء اعصابى ....
قعدت الف فى المكان واتفحصه كخبير عقارى جاى يثمن الشقه الكبيره دى، اقعدت اتعرف على نرمين اللى هيه استقبلتنى فى الاول اصلها كانت جميله جدا... المهم اسألها شويه عن الشركه ونشاطها وبقالها قد ايه فى الشركه وياترى ليكوا فروع، شويه معلومات برضه عشان نعرف احنا داخلين على ايه واهو تسليه وبنضيع وقت
وشويه لاقيت واحد واحد ابتدى يدخل لصاحب شركه التكييفات دى... قلت خير ... شويه لاقيت المقابله مابتاخدش غير 5 دقائق مع الراجل، كل واحد خمس دقايق تقريبا ويطلع... قلت ايه القلبان ده... ايه اللى بيحصل ده؟ مش ده العادى.. قلت خير مش مشكله حانعرف السبب

وانشغلت بالسبب اوى... كانى مراقب للوضع مش كانى داخل اعمل انترفيو... بيطلعوا بدرى كده ليه... هوه ايه الراجل ده بيقولوا ليهم ويخلص كده فى ثوانى؟ قلت اه ده باين له انترفيوا اكيد ليه سؤال محدد مثلا ولو ماعرفتوش يقولوا المقابله انتهت.
ده اكيد راجل غلس...
قلت بقى بحكم الفضول الحق حد من الناس اللى طلعوا اعرف عملوا ايه فى الانترفيو...
حضرتك عملت ايه فى الانترفيوا؟ ده انا اللى بسأل الشخص .... قال ايه ولا حاجة...
مافهمتش قلت له يعنى ايه ولا حاجة؟ قال لى ماعملتش اى حاجة جوة وفرصه سعيده
واخد بعضه ومشى.... طبعا انا مش فاهم ومش مستوعب الكلام الواضح جدا اللى هوه قاله " ولا حاجة "

قلت اصطاد الولد اللى حيطلع من الانترفيوا على طول واسأله يمكن افهم اكثر
ايه الاخبار جوة؟ قال لى ده راجل تعبان ودماغه تعبانه وشركه تعبانه... احسن لك ماتدخلش حاتتعب نفسيا
قلت ليه ؟ هوه انا داخل مستشفى العباسيه ازور حد جوه؟ ايه حتعب نفسيا دى؟
المهم انه أكد علينا ماحدش يقعد يستنى عشان يعمل انترفيوا

وابتديت افترض افتراضات وكل اللى معايا تقريبا قلنا ان الشركه دى مش مظبوطه وغريبه
دول ما اعلنوش عن نوع الوظيفه وطالبيننا نيجى فى ميعاد رخم ونفاجأ كمان ان فى انترفيوا
وغير كده وكده الانترفيوا مابياخدش خمس دقائق.. ومع العدد الكتير ده مش حانخلص قبل ثلاث ساعات ده على الاقل
وكمان الناس طالعه من الانترفيوا متضايقه واللى بيأفأف واللى بينفخ واللى بييجرى
تقريبا ثلت الناس اللى لسه ماعملوش انترفيوا مشيوا بعد ما عرفوا ان الانترفيوا ده مالوش لازمه والشركه مالهاش لازمه حتى اللى دخلوا الانترفيوا ماعرفوش الوظيفه هيا ايه.
قلت والله فعلا كده حتطول بس خلينى النهارده اعمل عبيط... اللى مشيوا دول اخدوا قرار صح بعد ما اتأكدوا ان الانترفيوا مالهوش لازمه
قلت معلش انا مش حاعمل عاقل النهارده .... وحاستنى لحد الاخر
قمت لفيت حولين الشركه ورحت اكلت وشربت عصير وشوفت شويه محلات عجبتنى ورجعت قعدت فى الشركه لاقيت العدد قل كتير

انت لسه قاعد؟ واحد من الشباب اللى جايين يعملوا انترفيوا بيسألنى.
قلت له بكل سذاجه.. "للاسف اه" قال لى طب ماتمشى... قلت له: " كده قاعدين وكده قاعدين خلينا نشوف الراجل ده حيودينا لفين... تعالى نقعد ونتكلم شويه عقبال ما ينادوا علينا... قال لى نتكلم ؟ انت بتتكلم ببرود كده ليه يا احمد؟ بقالنا ساعتين مستنين دورنا والدنيا داخله على بالليل وانت عايز تقعد لسه؟ دى شركه دى بالزمه ياراجل انا ماشى سلام
سلمت عليه ببرود وقلت له فرصه سعيده انى اتعرفت عليك...

طبعا هوه مش اسلوب فعلا اللى عملوه معانا مش بنى ادميين يسيبونا ثلاث ساعات ومافيش تكييف طبيعى اتشحنت منهم واخدت عنهم فكره سيئه جدا وقلت انا لازم ادخل للراجل ده وانا فاضى بقى عشان حتى ازعق فيه واهزئه واعرفه ازاى يعامل الناس كبنى ادمين يعنى انا جاى فى ميعادى ومحضر نفسى الاقينى مستنى الوقت ده كله كتير كده.

المهم كان ناقص قدامى بنتين يدخلوا الانترفيوا وانا اخر واحد، قلت اكيد الراجل النهارده لوحده عمل انترفيوهات بالهبل مع ناس كتير، أكيد حيكون تعب او جراله حاجة....

بعد ما خرجت البنت الاولى كان اسمها " هيام" قلت لها عملتى ايه؟
قالت لى هوه الراجل ما اتكلمش معايا خالص فعلا زى ما بيقولوا وعلى طول مشغول بيكتب فى ورق ويجيب ورق ويعمل تليفون ويجيله تليفون ... وفعلا ماسألينش ولا سؤال ولا حتى بيبص فى السيره الذاتيه... قالت لى اهوه عرفنا صنف من الناس اللى ممكن نقابلهم فى حياتنا
قلت لها خير ان شاء الله فرصه سعيده انى اتعرفت عليكى يا هيام...


عقبال ما البنت التانيه اللى ماعرفش اسمها دخلت تعمل الانترفيوا ، قعدت أسأل نفسى هوه الراجل ده بيعمل كده ليه؟
بيستخدم نفس الاسلوب ده مع كل الناس اللى بيعملوا معاه انترفيوا ليه؟
طب مش معقوله يعمل اعلان فى الوسيط عشان طلب موظفين ويعطل نفسه ثلاث ساعات فى مقابلات مابيتكلمش هوه فيها كلمه واحده ولا بيسأل سؤال واحد ويعمل دور المشغول جدا لدرجة مايقدرش يقول جمله واحده

هوه ممكن يكون اسلوب غلط وممكن يكون اسلوب صح فى عمل المقابلات... مش عارف...
طيب الراجل ده أكيد ليه دخله معينه؟ أكيد هوه عايز حد معين ومش لاقيه فى وسط العالم دول
طب انا لما حادخل حاعمل ايه؟ حاعمل نفس اللى عملوه الناس اللى دخلت و مشيت ؟

لاقيت باكلم نفسى بصوت عالى مايسمعوش غيرى..." اكيد فى حل للراجل ده... والحل حيظهر لى لما ادخل جوة واشوف الراجل
انا مختلف عن الناس اللى دخلت كلها... أنا حاعرف اتصرف مع الراجل ده "
نرمين جالها تليفون من عند الراجل الكبير على الساعه سته بالليل، بتقول له مافيش حد هنا غير واحد بس ....
أتفضل يا استاذ أحمد أدخل.... قلت أخيرا ... مش عايزه اجيبلك اى حاجة من جوة يا نرمين؟ طب سمعينا بقى دعوتين حلوين بقى عشان ربنا يكرمنا ان شاء الله.... عوضنا عوض الصابرين يارب

خبطت خبطتين على الباب وفتحت بشويش... وحاطط فى بالى انى امشى بخطوات واثقه لحد ما اسلم عليه ، ولما اسلم عليه احط عينى فى عينيه واعمل اتصال بصرى.... واقعد على الكرسى اللى على شمالى عشان ابقى جنب ودنه اليمين.. وايديا مفرودين عن بعض ورجلى كذلك وظهرى مستقيم وانا قاعد وماتحركش بالكرسى يمين وشمال لو كان بعجل... وانا باتكلم اتحرك بسيط فى الكرسى شويه مابقاش مخشب فى الكرسى... ... كل اللى قرايته حضر فى ذهنى ساعتها... المهم دخلت وسلمت وقعدت.. ولاقيته بيقول لى ثانيه واحده عشان ارد على التليفون... بكل برود قلت له اتفضل براحتك

ومن هنا لاقيته ابتدى تليفون ربع ساعه بيتكلم ... خلص المكالمه لاقيته ماتكلمش معايا وشغال بيعدل ويشطب على ورق... وما بيتكلمش فعلا خالص كانى مش موجود... قلت عشان كده الناس طهقت ومشيت بدرى.. شعروا بالاهانه من اسلوبه ده ...

قلت بقى مابديهاش بقى؟ بعد ما جاله كام مكالمه كمان كل واحده من خمس لعشر دقايق... رحت سألته سؤال باسلوب تعجب
هوه حضرتك مشغول اوى كده؟
رد عليا وقال لى ببرود : انت شايف ايه؟
قلت له : والله ربنا يعينك بجد على الشغل اللى مابيخلصش ده
قال لى : ربنا يخليك (ببرود شديد )
عدنا للحظات من الصمت تانى ومافيش اى كلام
حضرتك هيه الوظيفه اللى حضرتك عايزها فى شركتك دى ايه؟ اصل الانسه اللى بره ماتعرفش حاجة عن الوظيفه اللى احنا جايين عليها؟
قال لى: انا مشغول جدا مش حاقدر ارد عليك

قلت فى بالى ده تهريج وبيهرج وانا بهرج معاه... طب ادخل له ازاى الراجل ده...
واحنا قاعدين فى الصمت العميق ده قعدت افكر سريعا هوه انا كنت جاى هنا ليه؟ اعمل ايه؟
اه افتكرت... انا كنت جاى عشان اتعرف على الناس بس مش اكثر وكنت جاى اختبر نفسى فى الانترفيوا اشوف عملت ايه بعد اللى قرائته عن الاعداد لمقابله العمل.. بس مالقيتش ولا حاجة من الحاجات اللى قراتها مع الراجل ده حصلت

طرأت فى بالى الفكره قلت طيب بدل ما احنا اللى جايين نعمل انترفيوا .... انا اعمل معاه الانترفيوا ... هوه مش انا جاى اتعرف برضه عليه؟
انا حاقلب الحوار عليه... ولازم اشد انتباهه عشان يرد عليا ويتفاعل معايا
وكان الحوار كالتالى:

ممكن حضرتك تنسى انى جاى اعمل مقابله؟
قال لى: اومال انت جاى ليه؟
بدأت هنا استحوذ على انتباهه
قلت له: انا جاى هنا عشان اتعرف على حضرت واتعرف على الشركه اكثر لانى سمعت عن الشركه بتاعه حضرتك كتير وقد ايه انك راجل ناجح فى شغلك وشركتك عامله مبيعات كتيره والمنطقه هنا بصراحة كلهم بشتروا منتجات التكييف بتاعتك... فانا جاى هنا بصفتى عميل واحب انى اتعرف على انواع التكييفات اللى عندك يمكن اشترى تكييف للبيت عندى.... حضرتك ايه انواع التكييف اللى عندك؟


لقيت الراجل ابتدى يبص لى بعد ماكان منهمك فى الورق الكتير اللى على مكتبه ... وقال لى احنا شركه توزيع تكييفات
لاغلب انواع الماركات المشهوره فى السوق... وبنصدر لبره مصر ... وابتدى الحوار يحصل بينى وبينه عن منتجاته ونشاط الشركه ومحتاج واحد بس معاه يساعده فى الشغل ويسافر معاه ويتحمل ضغط الشغل

اندمجت اكتر فى الدور كعميل وقلت له عندك بروشورات وفلايرز اقدر اشوفها واتعرف عليها؟ وبتسلموا التكييف امتى؟ والصيانه عامله ازاى؟ والخدمات اللى بتقدموها بعد البيع... لاقيته بيتجاوب معايا وساب الشغل اللى فى ايده وقعدنا نتكلم شويه
وقبل ما امشى قلت له :
طيب انا اتشرفت بحضرتك جدا وحضرتك لو عايز منى اى حاجة دى السى فى بتاعى فى اى وقت ممكن تتصل بيا وأكيد انا برضه لازم اتصل بحضرتك عشان محتاجين تكييفين فى البيت... ( طبعا مش محتاج تكييف فى البيت ولا اى حاجة)
وقمت وسلمت عليه وشكرته على وقته اللى اداهولى من شغله ومشيت

قد ايه انا كنت سعيد جدا بعد ما مشيت من عنده انى قدرت احقق اللى ماحققهوش غيرى فى المقابله دى... حسيت انى فزت وانتصرت انى قدرت استحوذ على انتباهه ... وهوه ده اللى كان هوه عاوزه من كل الناس المتقدمين للوظيفه دى... كل اللى انا فرحان عليه انى قدرت اتصرف صح فى المقابله دى.

أخدت بعضى ورحت على البيت... لاقيتى امى بتقول لى انت قافل الموبايل ليه؟ قلت لها خير ، الموبايل فصل شحن
قالت لى فى شركه سالت عليك عايزينك فى شغل... قلت لها مين دول؟ قالت لى شركه فى تريومف بتاعه تكييفات.
قلت لها: ما انا كنت عاندهم دول من شويه، لو فى حاجة كانوا قالوا لى وانا هناك.. بيكلمونى تانى ليه دى الساعه سبعه دلوقتى وبيتكلموا؟
المهم ان الراجل صاحب الشركه حاول يكلمنى كل يوم على مدار اسبوع... فى مواعيد غريبه لحد ما وصل لى
رديت: ايوة انا احمد
هوه: حضرتك اتقبلت معانا فى الشغل وعايزين حضرتك تيجى تشتغل معانا من بكره
رديت: انا جاي لى شغل تانى فى مكان تانى للاسف لوظيفه انا حابب اشتغل فيها
هوه: حنديك المرتب اللى انت عايزه بس صاحب الشركه عايزك جدا واحنا كنا عايزين واحد بس من كل المتقدمين
رديت: حضرتك ممكن تقول له انى اتشرفت بمعرفته جدا
هوه: طيب حضرتك لو ماعجبكش الشغل التانى اللى انت رايح له... احنا فى انتظارك فى اى وقت

بهدها دخلت على النت والفيسبوك وكتبت على الحيطه اللى عندى...

اكسر حاجز خوفك من مقابلات العمل
"







6 comments:

HOSAM SAMI said...

موضوع أكثر من رائع
شكراً ليك يا أستاذ / أحمد
بالفعل حكاية تستحق القراءة
خصوصاً هذه الأيام المزدحمة بطالبي العمل

Rafiko said...

شكرا ليك يا حسام على ردك... وتحياتى اليك

MTTC said...

بصراحة مش عارف اقول ايه
بس عموما انا نتظر البريزنتيشن
وياريت تحط القصة الظريفة دى فيها
وممكن اقولك نصيحة حلوة قوى
ممكن تجمع مجموعة المدونات دى وتنشر كتاب قصص قصيرة فى مجال تحقيق الذات
الله ينور يابو حميد وفعلا
الحمد لله تخمينى ما طلعش غلط
فى انتظارك وانتظار مدوناتك
أيمن رشيد

Rafiko said...

شكرا ليك استاذى ايمن رشيد.. سعدت جدا بتعليقك على الموضوع.. وان شاء الله حاخلص امتحاناتى الاسبوع اللى جاى وابعت لحضرتك البريزنتيشن ان شاء الله قريب... حلوة فكره الكتاب اللى حضرتك قلت عليها... وجارى التنفيذ ان شاء الله

Wael Barakat said...

مدونات رائعة يا بوحميد ... إيه الموهبة دي كلها .. حقيقي أنا فخور بيك .
وائل بركات

Rafiko said...

تسلم يا وائل يا جميل ماتحرمش منك
انا اللى فخور انى اعرف ناس فى اخلاقك وذوقك

Custom Search