كل واحد فينا بيفكر فى حياتة طول الوقت، يعمل اية، يشرب اية، ياكل اية، يتعلم اية؟ طول ما الواحد عايش فينا بيفكر دايما فى مستقبلة فى حياتة العملية والشخصة، حاجات كتير الواحد يفكر ويقول انا باعمل كدة لية؟ اية اللى انا باعملة دة؟ ساعات توصل بتفكيرك للحظة انا هنا باعمل اية؟ تبقى مخضوض وتقول هوة انا هنا دلوقتى وعايش بقالى 25 سنة أو أكثر، وفى ساعة التفكير دى بتوصل انك تقول كلمتين؟
أنا مين؟ أنا فين ؟ ولية ؟ وعشان اية ؟ انا جيت ازاى؟ وجيت لية؟....... اوعى تفتكرونى كفرت لا سمح الله .... بس دى اسئلة عادية اكيد كل واحد ولو للحظة سأل نفسة الاسئلة دى.
لكن بعد ما سألنا الاسئلة دى؟ عملنا اية؟ هل عرفت ؟ هل فكرت ؟
انا قررت انى لازم الاقى اجابة على الاسئلة دى...... حتى عشان نلاقى لحياتنا معنى..... عشان كدة انا حبتدى معاكم
أولا : لازم تشوف نفسك دلوقتى انت واقف فين. " لحظة مع النفس الان"
سنك كام دلوقتى؟ انا دلوقتى باعمل اية فى الدنيا؟ عدى كام سنة وناقص كام سنة على عمرك؟ هل انا ليا هوية؟ انا فين فى العالم الكبير دة؟
اية اللى انا اكتسبتة واتعلمتة ومعايا دلوقتى فى اللحظة دى ؟
أكيد حتلاقى اجابات كتير على السؤال دة بشكل بسيط وسهل، أدخل بقى على المرحلة الثانية.
ثانيا : لازم تبص على نفسك من فوق.... وتعرف سبب وجودك فى الدنيا ...... عشان كدة حتبدأ من السطر الجاى تبص على نفسك من فوق.
انت عايش فى مقاطعة اللى هيه جزء من محافظة ، المحافظة دى جزء من بلد كبير ، البلد دة جزء من قارة ، هذة القارة جزء من الكرة الارضية، وفين الكرة الارضية ؟ دى جزء من مجموعة شمسية بها العديد من الكواكب....
الاخيرة وهى المجموعة الشمسية هى جزء من مجرة كبيرة بها العديد من الشموس والكواكب والنجوم....... وتسمى مجرة درب التبانة.
هذة المجرة هى واحدة من مجرات عديدة موجودة بالفضاء.....
أوعى تفتكر نفسك عايش بين اربع حيطان وبس ...... انت جزء من الفضاء وجزء صغير من مجرة وجزء اصغر من مجموعة شمسية وجزء متناهى الصغر فى كوكب الارض الذى يعيش علية المليارات من البشر، بل انت جزء من قارة بل جزء من بلد ومحافظة ومقاطعة تعيش فيها.
نسأل السؤال تانى ونقول انت مين ؟ أحنا مين ؟
ابدأ اسأل نفسك الان، هوة كل دة معمول عشانى ؟ مجرات ونجوم وشمس وارض تصلح للحياه وبلد عايش فيها؟ كل دة عشانى ؟
أكيد كل دة موجود لسبب ، ومين اللى عمل كل دة؟ أكيد مش حد مثلى..... دة اكيد بالفطرة الهى ، الله اللى خلق كل دة، وخلقنى انا لية؟
هوة اية اللى حصل وازاى كل دة حصل ؟ بقى انا موجود وسط كل دة ؟ دة انا اساوى اية بقى فى الدنيا دى؟
دة انا محتاج اعرف حاجات كتيرة اوى، بقى انا بقالى عايش كل السنين دى ومش عارف هوة كل دة معمول لية؟
لازم تعرف كمان حقيقة اننا حنموت وفى حياه تانية مستنيانا غير الحياه دى اللى احنا عايشينها. فلازم تعرف الحياه التانية دى حتعيش فيها ازاى؟ مبسوط وسعيد ؟ ولا لا قدًر الله مش مبسوط؟
يبقى لازم نعرف مواضيع معينة.
1- كيف بدأ و نشأ الكون؟ تعرف على الكرة الارضية؟
2- كيف خلق الانسان وما هو تكوينة؟
3- ما هى الروح والنفس؟
4- تعرف على تاريخ البشرية حتى الان؟ تعرف على لغتك الأم.
5- تعرف على بلدك ووطنك = تعرف على تاريخ بلدك؟
6- تعرف على دينك - رسولك - مذهبك الدبنى
7- تعرف على الموت؟ والبرزخ والجنة والقيامة؟
8- تعرف على عدوك
دى هويتك ودى الحاجات الاساسية اللى لازم تعرفها.
حتعرف بعد كدة انت مين؟ وحتعرف هويتك؟ وحتعرف تاريخك؟ لأنك لى تاريخ من قبل ما تتولد.... وكل دة عشان تعرف مستقبلك وانت رايح على فين.
انا حابتدى معاكم ووحاول جاهدا انى اوفر لكم المعلومات اللازمة عشان نبدأ مع بعض.
ندخل على المرحلة الأخيرة
ثالثا: ناوى تعمل اية فى مستقبلك، ناوى تعيش ازاى؟ حتعمل اية فى حياتك القادمة؟
طبعا كلة حيقول المستقبل بايد الله سبحانة وتعالى ، وانا سايبها على ربنا ، وماحدش عارف بكرة فية اية.
لو عرفت نفسك حتعرف مصيرك اية.... حتعرف تخطط لمستقبلك ..... وتحدد انت عايز تبقى اية فى حياتك.
حتحدد لنفسك هدفين:
1- هدف دنيوى " يبقى ليك هدف فى الدنيا"
2- هدف أخروى " يبقى ليك هدف فى الاخرة"
هدف الدنيا دة لازم يبقى مربوط بهدف الاخرة، بمعنى ان الهدفين مربوطين مع بعض. يعنى انت بتعمل الهدف اللى فى الدنيا دة عشان تحقق هدف الاخرة. ومش حنختلف ان هدف الاخرة انى ادخل الجنة... طبعا احنا حندخل الجنة فى الاخر مش باعمالنا ولا بصلاتنا ولا بفعلنا للخير، لو حندخل الجنة يبقى حندخلها برحمة ربنا سبحانة وتعالى.
قبل الهدف لازم يكون ليك رؤية معينة تجاه نفسك وبلدك ودينك.
حطيت هدفك ورؤيتك يبقى لازم بعد كدة تعرف نفسك.... لازم تعرف شخصيتك ، لازم تعرف نقاط قوتك اية ونقاط ضعفك.
اية صفاتك الكويسة واية صفاتك اللى عايزة تتغير؟ ولية عايز تغيرها. عشان تبدأ فى تغيير نفسك للافضل عشان تحقق هدفك ورؤيتك اللى انت حددتها لنفسك. اكيد فى حاجات انت ماتعرفهاش عن نفسك ....
عرفت نفسك ؟ ابدأ بقى فى تغيير وتطوير نفسك وهى العملية الاصعب فى اولها ولكن بعد ذلك يصبح كل شئ سهل.
استعين بالخبراء فى الموضوع دة وابحث فى الانترنت وماتاخدش من مصدر واحد بل من عدة مصادر.
اعمل اختبارات شخصية معروفة ومعتمدة، اتعلم وطور مهاراتك واقرأ مقالات فى التنمية البشرية. أشتغل على نفسك.
انت بقى بتحب تعمل اية؟ اية الحاجة اللى بتحب تشتغلها وتعملها وانت مبسوط؟ وانت سعيد؟ وانت متحمس ليها؟
شوف اية المسار الوظيفى المناسب ليك، وابدأ من الصفر واتعلم فية كل حاجة من أولها.
عندك فى اختبارات تحديد المسار الوظيفى بناء على شخصيتك ومهاراتك على الانترنت.
خلاص انت حددت انت حتشتغل فى اية؟ وبتحب تشتغل فى اية؟ كدة انت يبقى قطعت شوط كبير جدا، أدخل بقى على هرم ماسلو للاحتياجات الشخصية عشان تعرف انت احتياجاتك الطبيعية اللى انت محتاجها وشوف اية الحاجة اللى ناقصاك عشان تكملها واشتغل عليها.
شوف بقى حتعمل اية فى حياتك الشخصية والعملية والاجتماعية..... ابدأ خطط لحياتك وحدد انت عايز اية.
اجتهدت فى هذا العمل اخلاصا لوجة الله ولا اريد سوى دعاؤكم لى.
لأى استفسار ارحب بجميع الاستفسارات والاقتراحات.
كانت هذا اجتهادى وجهة نظرى الشخصية المتواضعة التى تقبل النقد والتصحيح.
وشكرا
_1110.jpg)
