::امتى حتكتب قصة نجاحك؟::

امتى حتكتب قصة نجاحك؟ امتى تلاقى الناس يحكوا حكايه نجاحك وتفوقك؟ امتى حتكتب كتاب سيرتك الذاتية؟ امتى تحس انك ناجح وبتدوق طعم النجاح؟ مش نفسك تبقى ناجح او مشهور او قدوة لاصحابك وزمايلك؟ مش عايز يبقى اهلك واصحابك فخورين بيك؟

طيب انت ناوى تعمل اية عشان كل دة يحصل؟ ناوى تقعد قدام الكمبيوتر والنت وبس.... بص مادام ماعندكش همة او ماعندكش حماس لأنك تعمل اى حاجة مش حتعمل... انما لو حاطط الموضوع فى دماغك واحاسيسك ومشاعرك كلها تجاه الموضوع او الفكرة اللى انت عايزها دى وتوكلت على الله وصدقت النية حتلاقى ربنا بيساعدك وبيوفقك.
ساعات بتبقى تعبان وزهقان وقرفان ومالكش نفس فى حاجة تعملها، ماتسيبش نفسك كدة، لازم تبقى مدرك لتصرفاتك واعمالك اللى بتعملها فى كل يوم وفى كل ساعة وفى كل دقيقة وثانية من يومك، انت حياتك دى ملك مين؟
حياتك دى ملك لله وحدة، انما انت ليك حقوق على نفسك لازم توفيها ، ماتسيبش نفسك كدة بص لنفسك كويس انت راضى عن نفسك كدة، هل انت محدد هدف لنفسك ولحياتك ودنيتك واخرتك؟ انت عايز من نفسك اية؟ دور بنفسك جوة نفسك حتعرف انت مين وفين ولية.

امتى حتفوق وتبتدى يبقى ليك اسم بين اصدقائك واصحابك وجيرانك؟ امتى تحس انك تستحق ان الناس يقدروك ويحترموك ومشهور مابين الناس باعمالك او بعلمك او باخلاقك او باى شئ، من دلوقتى ومن قبل ما تكون حاجة كبيرة ، انت دلوقتى خلاص بقيت مشهور اقنع نفسك بكدة خلاص وخليك واثق فى نفسك وفى قدراتك هوة انت لسة حتستنى تفكر التفكير دة بعد عشر سنين او عشرين سنة.؟
انت من دلوقتى خلاص مشهور وعندك علم واخلاق واعمال الناس بيتحاكوا عنها... الموضوع مش بعدين الموضوع دة تعمله دلوقتى وتقنع بية نفسك خلاص دة امر واقع واتصرف بتصرفات اى راجل مشهور ومعروف مش واحد لسة بيبتدى حياته.
اقنع نفسك ان دى مسأله وقت لكن انت خلاص اصبحت هذا الشخص اللى انت عايز تكون عليه، حسألك نفس السؤال تانى، امتى حتكتب قصة نجاحك؟؟؟!!!!!